Í farnu viku vitjaðu Margit Stórá, landsstýriskvinna í heilsumálum, og embætisfólk Etiska ráðið í nýggju hølunum. Hetta var í sambandi við at ársfrágreiðingin fyri 2023 varð handað.
Etiska ráðið flutti síðst í 2023 inn í nýumvæld høli hjá KFUK í Tórshavn. Hetta eftir at KFUK vann útboðið á Keypsportalinum tá Etiska ráðið, við hjálp frá Landsverki, lýsti eftir nýggjum hølum. Í tí sambandi ynskti Etiska ráðið at vísa landsstýriskvinnuni runt í nýggju hølunum, og vísa fram teir hentleikar, ið ráðið hevur fingið atgongd til við leigumálinum.
Tískil vórðu landsstýriskvinnan og tey embætisfólk, ið varða av Etiska ráðnum, boðin at koma framvið, og ársfrágreiðingin fyri 2023 varð handað við sama høvið.
Formaðurin í Etiska ráðnum, Bergur Debes Joensen, og fakligi skrivarin hjá Etiska ráðnum, nýttu høvið at greiða frá tí virksemi, ið hevur verið, eins væl og greiða frá framtíðarætlanum, og seta fram ynski um, at Etiska ráðið verður uppraðfest á fíggjarlógini fyri 2025.
Formaðurin og landsstýriskvinnan blivu samd um, at Etiska ráðið vitjar Heilsumálaráðið í heyst, og at frameftir verður miðað ímóti, at landsstýriskvinnan hevur tveir fundir um árið við Etiska ráðið.
Etiska ráðið gleðist um, at landsstýriskvinnan og embætisfólk hennara tóku sær tíð til hetta, og vísa áhuga fyri arbeiðinum, ið Etiska ráðið stendur fyri.
Ársfrágreiðingin fyri 2023 kann lesast her: https://etiskaradid.fo/project/arsfragreiding2023/
Á myndini síggjast frá vinstru síðu: Regin Berg, fakligur skrivari, Guðrun Maria Mortensen, fulltrúi, Jan Simonsen, deildarstjóri, Margit Stórá, landsstýriskvinna, og Bergur Debes Joensen, formaður í Etiska ráðnum.