E2018, skribent på Etiska ráðið

Almenn og ókeypis ráðstevna um raðfestingar í almennum heilsutilboðum

8. septembur 2025 varð almenn ráðstevna hildin í Norðurlandahúsinum við heitinum “Raðfestingar í almennum heilsutilboðum: Hvat er rætt og rættvíst at gera?”. Ráðstevnan hevði til endamáls at birta í kjak um raðfestingar av heilsutilboðum innan almenna geiran, og at varpa ljós á týdningin av gjøgnumskygni og rættvísi í raðfestingarprosessum.

Á skránni vóru fyrilestrar at hoyra um raðfestingar úr ymiskum sjónarhornum:

• Kjeld Møller Pedersen, professari í heilsubúðskapi, Syddansk Universitet.

• Sirið Stenberg sum fyrrverandi landstýrisskvinna í heilsu- og almannamálum.

• Hjørdis Mortensen, stjóri í almannaverkinum.

• Pál weihe sum professari í arbeiðismedisin og fyrrverandi leiðari á Landssjúkrahúsinum.

• Jógvan D. Hansen, lærari í heimspeki á Fróðskaparsetri Føroya.

• Pallborðskjak. Jana Mortensen leiddi.

Ráðstevnan var ókeypis, og var stuðlað av Betri Stuðul.

Tað vóru Etiska ráðið, Sjúkrarøktaretiska ráðið, og Siðfrøðinevndin hjá felagnum Føroyskir Sálarfrøðingar, sum í felag skipaðu fyri.

Magni Højgaard nýggjur limur í Etiska ráðnum

Leif Olsen, sum hevur verið limur í Etiska ráðnum, síðani ráðið fór til verka 1. januar 2018, hevur valt at takka fyri seg. Í hesum sambandi takka vit Leif Olsen fyri drúgva og virðismikla tænastu í Etiska ráðnum, har hann við sínum royndum og háttalagi hevur verið við til at mynda kjakið um etiskar spurningar í samfelagnum.

Eftir tilmæli frá landsstýrismanninum í almanna- og mentamálum hevur landsstýriskvinnan í heilsumálum nú tilnevnt Magna Højgaard sum nýggjan lim í Etiska ráðnum.

Magni Højgaard er 44 ára gamal og starvast sum leiðari í Rówt. Rówt er eitt uppsøkjandi og samskipandi tilboð til ung í Føroyum við álvarsomum avbjóðingum innan sálarheilsu og bundinskap. Hann hevur áður verið leiðari á sosialu eindini hjá Bláa Krossi Føroya (2015–2019), og hevur harumframt drúgvar royndir úr Danmark, har hann arbeiddi á Mændenes Hjem á Istedgade í Keypmannahavn.

Við tilnevningini av Magna Højgaard fær Etiska ráðið ein lim við breiðum innliti í sosialar og heilsuligar spurningar og við hollum royndum úr arbeiðinum við menniskjum, sum ofta liva á útjaðaranum av samfelagnum.

Etiskir spurningar við atliti til berarakanningar fyri álvarsligar arvaligar sjúkur

Alment skriv frá Etiska ráðnum,

Tórshavn, 5. feb. 2025.

Etiska ráðið hevur til endamáls at fremja og styrkja kjak og vitan um etiskar spurningar, ið stinga seg upp í tí føroyska samfelagnum. Ráðið hevur í rúma tíð valt at arbeiða við málinum um berarakanningar viðvíkjandi álvarsomum og ofta deyðiligum arvaligum sjúkum í Føroyum. Ítøkiliga snýr hetta skriv seg um fyrimunir og vansar við tílíkum kanningum.

Til ber at lesa skrivið her:

Etiskir spurningar við atliti til berarakanningar

Uppskot til Løgtingslóg um broyting í Revsilógini og Frástøðuboðslógini

Uppskot til løgtingslóg um broyting í løgtingslóg um revsing (Revsilógin) og løgtingslóg um frástøðuboð, uppihaldsforboð og burturvísing (Frástøðuboðslógin) (Ágangur móti alment settum starvsfólki, tráfylging, sálarligur harðskapur og kartellavtalur undir serliga skerpandi umstøðum) var sent Etiska ráðnum til ummælis 13. januar 2025. Hoyringarsvar var sent Løgmálaráðnum 13. februar 2025.

Les hoyringarsvarið